Nuuk Snow Fest ukiut tamaasa pisarpoq marsimi sisamanngornermit siullermit sapaat ilanngullugu ingerlanneqartarluni. Festivali Nuup qeqqani ingerlanneqartarpoq.

Nuuk Snow Fest tassaavoq apummik ilusilersuilluni apummik nuannarisalinnut qassinilluunniit ukioqaraluartunut unammisitsineq. Aammattaaq aliikkusersuinerit tusarnaartitsinerillu ingerlanneqartarnerisigut innuttaasunut tikeraanullu nuannisarfiuvoq ornigarneqarluartartoq.

Nuuk Snow Festimi pingaarnertut anguniagaavoq najukkami ataqatigiinnerit patajaallisarnissaat kiisalu Kalaallit Nunaanni piorsarsimassutsikkut kingornutassanut tigussaanngitsunut illersuilluni pingaartitsilluni festivaliulluni. Kingulleq festivalimi qulequtarineqartut, sammisassat aliikkusersuinerillu atorlugit ilaatigut suliarineqartarpoq.

Nuummi innuttaasut suliniarfigineqarput qassinilluunniit ukiullit ilaqutariit meerartallit immikkut sammineqarlutik. Festivalimi peqataaneq akeqanngilaq aalakoornartulimmillu atuiffiunani.

Nuuk Snow Festip apuserinikkut illoqarfik tamaat ataatsimoortittarpaa.

Nuuk Snow Fest suua?

Nuuk Snow Festimi anguniagaavoq peqataasut holdit 20-t missaanniittut tamarmik apummik issoqqaarissumik 3x3x3m-imik ilusilersugassaqarlutik peqataanissaat. Peqataasut sisamanngornermi ullaakkumiit sapaammi ualeq tikillugu piffissaqarlutik aalajangersimasumik ilusilimmik imaluunniit aalajangersimasuunngitsumik ilusilimmik suliaqassapput, festivalimut aaqqissuisut ukiumut qulequtsiussaat aallaavigalugit qanoq iluseqarnissamik paasinninnertik ersersinniartarpaat.

Festivalimik aaqqissuisut naliliisartutut toqqagaannit pingasuusunit ilusilersukkat naliliinermut immersugassaq atorlugu 0-imit - 5-imut nalilersorneqartarput. Peqataasut 1-imut, 2-mut aamma 3-mut ajugaanniuttarput kiisalu Isiginnaariat akissarsiuttagaannik pinnassinnaapput.

Aliikkusersuineq

Festivalip ingerlanerani najukkami eqqumiitsuliortut assigiinngitsut tusarnaartitsinerannik ingerlatsisoqartarpoq. Unnukkut qulliit atorlugit takutitsisoqartarpoq, ilusilersukkat qalipaatit kusanartut atorlugit qaammarsarlugit seqersiffigineqartarlutik. Pilersaarut inaagaq aatsaat pissarsiarineqarsinnaavoq festivalip aallartinnera sapaatip-akunneranik sioqqullugu.

Kajumissutsiminnik sulisartut

Nuuk Snow Fest aatsaat ingerlanneqarsinnaavoq kajumissutsiminnik suliaqarusuttut ukiut tamaasa festivalimik suleqataallutik kivitseqataasaraangata. Apummik ilusiliorluni festivaleqartitsinermi kajumissutsiminnik suliaqartartut pinngitsoorneqarsinnaanngillat, taakkua festivalip ajunnginnerpaamik ingerlalluarnissaa isumagisarpaat. Suliassat ilaat tassaasarput peqataasunut atortussanik piareersaaneq, peqataasussanik nalunaarsuineq, init kialaarfiit piareersarnerat kiisalu peqataasut takusaasullu ornissinnaasaanni arlaannik ikiortariaqaraangata.